Axentes da Policía Local de Ourense auxilian un home que se atopaba en estado de asfixia realizándolle a manobra de Heimlich

Axentes da Policía Local de Ourense auxiliaron a mediodía de onte un varón que se atopaba tendido no chan, en estado de asfixia, na Avenida da Ribeira Sacra, no Parque Miño.

Os policías, que se atopaban nas proximidades da zona, foron alertados da situación, e acudiron ao lugar ás 14.10 horas a auxiliar o home (de 46 anos de idade, e veciño de Tui, Pontevedra) que se atopaba tendido no chan en estado de asfixia por obstrución das vías respiratorias, por un posible atragoamento.

Os axentes de forma urxente iniciaron a manobra de Heimlich (compresión abdominal), e acadaron a expulsión dun anaco de comida que lle obstruía as vías respiratorias.

A ambulancia foi enviada ao lugar, aínda que non foi necesaria intervención ningunha para que o varón se recuperase ao cabo duns minutos. A acertada e urxente intervención dos axentes propiciou que o desenlace non fose negativo.