O Presidente da Deputación de Lugo enxalza o potencial turístico da Ribeira Sacra na primeira xornada de FITUR 2025

O Presidente da Deputación de Lugo, José Tomé Roca, participou este mércores en Madrid na Feira Internacional de Turismo (FITUR) na presentación do xeodestino Ribeira Sacra, Candidatura a Patrimonio Mundial e compromiso coa mobilidade sostible e a mellora continua, que se celebrou no stand de Turismo de Galicia. A este acto tamén asistiu o Presidente da Xunta de Galicia, Alfonso Rueda Valenzuela, o Presidente do Consorcio de Turismo Ribeira Sacra, Luis Fernández Guitián, e o Presidente da Deputación de Ourense, Luis Menor Pérez, entre outras autoridades.

O mandatario provincial subliñou que a comarca da Ribeira Sacra é "un destino que sempre me gusta definir como un anaco de paraíso no interior de Galicia. Un recuncho singular que non é simplemente unha paisaxe excepcional, senón que se trata dun enclave inigualable que representa parte da nosa tradición e historia".

Na súa intervención, Tomé Roca lembrou que "estamos vivindo un momento crucial para esta comarca coa candidatura da Ribeira Sacra a Patrimonio da Humanidade" e recalcou que "a Deputación de Lugo impulsou, desde un primeiro momento, a consecución desta distinción internacional e continuaremos realizándoo para que a Ribeira Sacra reciba este prestixioso recoñecemento". Por último, rematou facendo fincapé na importancia de traballar "de forma conxunta para facelo realidade".

Por outra banda, nesta primeira xornada de FITUR 2025 a Deputada de Réxime Interior, Promoción do Territorio e Turismo, Pilar García Porto, sumouse á presentación do proxecto Turembalse, que tivo lugar no stand de Turismo de Navarra.

García Porto recalcou que a institución provincial forma parte desta iniciativa "relacionada coa auga, porque está aliñada coa nosa aposta por un turismo sostible, de calidade, que coida do patrimonio e deixa un alto valor no territorio".

"Desde a Deputación de Lugo consideramos que os encoros son un recurso natural de gran valor, que poden potenciarse de forma responsable e sostible. Este proxecto reflexa, precisamente, unha aposta clara por aproveitar as augas interiores como motor turístico, sen comprometer ao medio ambiente", avanzou.

Ademais destes actos, José Tomé tamén asistiu, xunto á Deputada de Réxime Interior, Promoción do Territorio e Turismo, Pilar García Porto, á presentación da XVII edición da guía da Asociación Provincial de Empresarios de Hostalaría e Turismo de Lugo (APEHL) ... E para comer Lugo.

A axenda continuará este xoves coa presenza da Deputación de Lugo nas presentacións dos proxectos turísticos da Mancomunidade de Concellos de Mariña e Expomar.