Donostiako Udalak hasierako onarpena eman dio 2024-2029 Hiri Mugikortasun Jasangarriaren Planari, eta espedientea jendaurrean jarri du 45 egunez, alegazioak aurkeztu ahal izateko eta plana onartzeko prozeduran parte-hartze publikoa sustatu eta bermatzen duen programa onartzeko.
Tokiko Gobernu Batzarrak, halaber, hasierako onarpena eman dio Isuri Gutxiko Eremuaren Proiektuari, eta 30 eguneko jendaurreko eta parte hartzeko epea jarri dio proiektuari, herritarrek eta inplikatutako erakundeek proiektuari dagokionez egin ditzaketen ekarpenak jasotzeko.
Eneko Goia alkateak gogorarazi du bi proposamenek osatuko dutela "Donostiak datozen hamarkadetan izango duen mugikortasunaren oinarria, ibilgailu pribatu gutxiagorekin, garraio publiko gehiagorekin eta garraio aktibo gehiagorekin. Horren helburua da isuriak eta zaratak murriztea eta gune publikoak hobetzea, gure hiria bizitzeko leku atseginagoa izan dadin".
Bizikletentzako aparkalekua Bentaberrin
Tokiko Gobernu Batzarrak Bentaberri Plazan bizikletentzako aparkalekua egiteko lokal bat egokitzeko proiektua onartu du, 93.000 euroko aurrekontuarekin.
Egokitze-lanek lokal horren barrualdeari eta mendebaldeko eta hegoaldeko fatxadetan dauden bi tarte handiren itxiturari eragingo diete. Lokalaren geometria kontuan hartuta, bi zatietan banatzea erabaki zen. Gune handiena bizikletak aparkatzeko erabiliko da, eta eranskin txikiena etorkizunean izan daitezkeen erabileretarako gordeko da.
![Foto de la noticia](https://pictures.lanocion.es/2023/diciembre/26/img_3985.jpg)
2023ko EPEa zabaltzea
Tokiko Gobernu Batzarrak 6 administrari lanpostuko tasa gehigarria onartu du.Lanpostu horiek betetzeko hautaketa-prozesu baterako deialdia egingo da, eta prozesu hori egonkortzearen arloan dagoen berariazko legeriara egokitu beharko da.
Eskainitako administrarien bost lanpostutarako, izangaiek euskararen bigarren hizkuntza-eskakizuna esleituta izan beharko dute. Horietako batek hirugarren hizkuntza-eskakizuna izan beharko du.
Plaza horietara sartzeko baldintza guztiak, gai-zerrendak eta hautaketa-prozesuarekin zerikusia duten gainerako gaiak deialdiaren oinarrietan zehaztuko dira. Deialdia, ohi bezala, Donostiako Udalaren web orrian ere argitaratuko da (www.donostia.eus). Une honetan, hainbat fasetan abian dauden hautaketa-prozesu guztiak kontsulta daitezke bertan, arruntak zein egonkortzekoak.
PSIZerako ibilgailua
Tokiko Gobernu Batzarrak onartu du Donostiako PSIZerako Aginte Postu Aurreratuko funtzioak betetzeko kutxa itxia eta alboko irekiera duen kamioi baten hornidura kontratatzeko espedientea, 181.500 euroko lizitazio aurrekontuarekin eta gehienez 12 hilabeteko entrega-epearekin.
Igeldoko Toki Erakunde Txikia
Tokiko Gobernu Batzarrak Igeldoko Toki Erakunde Txikia eratzea erabaki du, eta, horrez gain, Toki Erakunde Txikiaren oinarri izan behar duen lurraldeko hautesleei kontsulta egitea. Kontsulta hori Udalbatzak hartutako eratze-erabakiaren ondoren egin beharko da, Toki Erakunde Txikia sortzeari buruz duten iritzi ez-loteslea lortzeko.
Igeldoko espaloia
Tokiko Gobernu Batzarrak Igeldoko saihesbidearen mendebaldeko irteeraren eta kanpinaren arteko espaloia eraikitzeko proiektuan jasota dauden obrak kontratatzeko espedientea onartu du, 1.586.050 euroko aurrekontuarekin eta 6 hilabeteko gauzatze epearekin (jarduketak Europar Batasuneko Berreskuratze eta Erresilientzia Funtsak finantzatutakoetan sartuta daude – Next Generation Funtsak –).
Proiektuak 4 jarduketa nagusi ditu. Alde batetik, 1.5 eta 2 m arteko zabalerako espaloia proiektatu da, Igeldoko hirigunea kanpinarekin lotzen duena. Bestalde, aipatutako puntuen arteko sarbidea uniformizatzea proiektatu da, bai zabaleran bai luzeran. Azkenik, espaloiaren trazadura berriaren eraginak jasango dituzten sare telefonikoak, elektrizitatea, argiteria publikoa eta euri urak lurperatzea proiektatu da.
Infernua
Tokiko Gobernu Batzarrak behin betiko onartu du Infernua eremua urbanizatzeko proiektua. Proposamenaren helburua eremua birsortzea da, hiriko sarreretako bati irudi berri bat emanez. Aurkeztutako dokumentuak teknikoki definitzen ditu eraldaketa hori ahalbidetuko duten urbanizazio-lanak.